Elprísurin kvinkaði uppeftir á nýggjárinum
Húsarhaldini skulu rokna við at brúka uml. 30 kr. meira um mánaðin til elrokningina i 2020, eftir at eykaaðalfundurin í SEV í november 2019 samtykti eina lítla hækking.
Oljuútreiðslur og átrokandi útbyggingar í elskipanini seinastu fimm árini eru orsakirnar til, at elprísurin hækkaði fimm oyru/kWt fyri húsarhaldini og 10 oyru/kWt fyri ídnaðarkundarnar 1. januar 2020. Fyri eitt vanligt húsarhald – svarandi til 6000 kWt – merkir hækkingin eina meirútreiðslu á uml. 30 kr. um mánaðin, t.e. 375 kr. um árið íroknað MVG.
Í framrokningunum fyri 2021 verður eisini víst á, at talan helst gerst um eina príshækking í 2021 á fimm oyru/kWt fyri allar kundar.
- Tað veldst kortini um, hvussu støðan sær út um eitt ár. Tá meta vit nærri um ítøkiligu viðurskiftini, segði John Zachariassen, nevndarformaður í SEV, tá ið príshækkingin var samtykt á eykaaðalfundinum í SEV 29. november 2019.
Elprísurin lækkaði fimm oyru/kWt í 2017 og í 2018, men í 2019 hækkaði prísurin aftur 10 oyru/kWt upp á sama prísstøði sum í 2014. Sostatt hevur elprísurin seinastu fimm árini ikki verið hægri, enn elprísurin var í 2014.
Elprísurin kom í 2019 upp aftur á sama støði sum í 2014.
SKYNSAMUR BÚSKAPUR
- Vit vilja skapa sum minst órógv við elprísinum, men vit noyðast sjálvandi at hava ein skynsaman búskap, meðan áhaldandi verður arbeitt við at hava eina støðuga elveiting og at fáa til vega grønari orkuframleiðslu. Ein varlig hækking er neyðug, men tað er ljós fyri framman, staðfestir John Zachariassen, nevndarformaður í SEV.
Nevndarformaðurin vísir á, at tríggjar nýggjar vindmyllulundir verða bygdar í næstum. Tá verður vindorkumátturin meira enn trífaldaður úr 18 MW upp í 60 MW. Pumpuskipan verður fyrireikað, umframt at sólorka og sjóvarfalsorka eru í áhugaverdari menningartilgongd.
- Tú kanst siga, at vit eru við at koma upp á tindin. Men áðrenn vit merkja undanbrekkuna, noyðast vit at taka okkum seinasta strekkið niðaná við nøkrum oljuútreiðslum aftrat og neyðugum íløgum í elveitingina, t.d. net íroknað pumpuskipan og koplingarstøðir, sigur John Zachariassen.
Nevndarformaðurin leggur dent á, at vit nærkast einum tíðarskeiði, har grønar útbyggingar við tilhoyrandi netútbyggingum fara at síggjast væl aftur í fíggjarætlanini hjá SEV, tá ið oljuútreiðslurnar næstu árini minka í stórum lopum, so hvørt útbyggingarnar verða framdar.
