Verkætlanarøkið í Vestmannasundi er friðað

Verkætlanarøkið í Vestmannasundi er friðað
Mint verður á, at í sambandi við royndarverkætlanina við sjóvarfalstøkni í Vestmannasundi eru økini friðað fyri allari fisking, kaving og arbeiði á havbotninum.

Neyðugt er at fara varliga fram kring verkætlanararøkini í Vestmannasundi. Sjóvarfalsdrekarnir eru festir í undirstøði á botni, og teir sveima runt í sjónum í einum 8-tali. Á drekunum situr ein turbina við einari skrúvu, sum í ferðini melur og framleiðir elorku.

Verður eitt nú fiskað tætt við drekarnar er vandi fyri, at línan fløkist í útgerðini. Hetta kann skaða bæði reiðskapin og drekarnar.

Økið er tí friðað fyri allan fiskiskap, alla kaving og arbeiði á havbotninum. Harumframt er neyðugt at vísa stórt varsemi, tá siglt verður í økinum. Økini eru merkt á sjókortinum, sum vísir verkætlanarøkini, mitt í sundinum – millum Oyrargjógv á vágalandinum og Egilsnes á streymoyarlandinum.

Tað ber til at síggja knattstøðurnar á Google Maps, sum vísir neyva verkætlanarøkið í fartelefonini. Verkætlanarøkið er eisini sjónligt á www.fishin.fo.

Steðga undir grindarakstri

Um tað gerst neyðugt at reka grind ígjøgnum Vestmannasund, skal sýslumaðurin boða vakthavandi á Fossáverkinum hjá SEV í Vestmanna frá. Drekarnir verða síðani steðgaðir, so teir ikki órógva raksturin.

Um illa vil til, og útgerð – antin hjá einum sjálvum ella hjá SEV – fær skaða, so skal SEV boðast frá. Er okkurt hent, so at vandi er á ferð, ella er okkurt áfatt, sum kann hava vanda við sær, er umráðandi at boða sjóbjargingarstøðini, MRCC, frá beinanvegin.

Tak niður

Yvirlit yvir verkætlanarøkið

Hjálp okkum at gera síðuna so góða sum gjørligt - send okkum hugskot ella viðmerking
Send viðmerking