Jarðgass koyrir orkumarknaðin um koll

Bíligt jarðgass floymir inn yvir orkumarknaðirnar júst nú. Hetta kann koyra alt veðurlagskjakið um koll, skrivar Jyllands Posten.

Tað kostar nevniliga bert helvtina so nógv at framleiða ravmagn á einum jarðgassriknum orkuverki sum frá havvindmyllum.

Stórt prísfall

Nýggir framleiðsluhættir og ein fallandi nýtsla hava havt við sær stórt prísfall, sum beint nú sær út til at ávirka menningina í USA, so alt fleiri jarðgassrikin orkuverk koma undan kavi, meðan stígur er komin í framleiðsluna úr varandi orku.

Serfrøðingar siga, at prísurin á jarðgassi á amerikanska marknaðinum er fallin 50 prosent síðani 2008.

Nógv færri vindmyllur í ár

Í fjør varð met sett á amerikanska vindmyllumarknaðinum við 10.000 MW nýggjum vindmyllum. Í ár er talan um eina heilt aðra søgu.

Sambært vindmylluráðgevingarfyritøkuni Make Consulting koma amerikanarar bert upp á stívliga 6.000 MW vindmyllur í ár.

Niðurjusteringin hjá Make Consulting ber í sær ein niðurskurð í ætlaðu vindmylluútbyggingini í USA í 2010-2012 uppá 23 prosent, svarandi til 2.500-3.000 vanligar myllur á landi.

Orsøkin er økt útvinning av gassi, ið - sum nevnt omanfyri - hevur havt við sær eitt fall í gassprísinum uppá 50 prosent síðani 2008 og harvið bíligari streym frá gassverkunum. Elprísurin er nú so lágur, at torført er at fáa bankarnar at stuðla nýggjum vindmylluverkætlanum, skrivar Jyllands Posten.