Sjóvarfalsorka

SEV samstarvar við svensku fyritøkuna Minesto um eina royndarverkætlan við sjóvarfalsorku í Vestmannasundi. Samstarvið er fyrsta stigið í ætlanunum um at leggja sjóvarfalsorku aftrat samlaðu samansetingini av burðardyggum orkukeldum í føroysku elorkuframleiðsluni.

Sjóvarfalsorkuverkætlanin er ein tvey-ára royndarverkætlan, sum fevnir um tveir 'drekar', sum eru festir í botnin, og sum ferðast rundan um hetta botnfestið í einum áttatali. Drekarnir, sum verða royndarkoyrdir í Vestmannasundi hava fingið nøvnini Havfrúgvin og Drekin.

Hví sjóvarfalsorku?

Fyrimunir við sjóvarfalsorku eru millum annað, at sjóvarfallið er forsøgið og ikki tongt at veðurlíkindum og eins óstøðugt sum t.d. vindorka, vatnorka og sólorka. Harumframt hevur sjóvarfalsorkutøknin sera lítið náttúruinntriv við sær, og als einki sjónligt árin á náttúruna.

Sjókaðalin, sum leiðir elorkuna, kemur upp á land á Oyrargjógv, har ein fyribils transformarastøð er sett upp til at taka ímóti framleiddu elorkuni.

Minesto hevur ment slóðbrótandi tøkni at vinna el úr sjóvarfalsorku, har rákið er lítið. Við einum sloðbrótandi og patenteraðum prinsippi líkt einum dreka, sum flýgur í vindinum, framleiðir Deep Green-tøknin hjá Minesto elorku í støðum við lítlum ráki og úr havstreymi.

1. desember 2020 komu fyrstu kWt úr sjóvarfalsorku inn á føroyska elnetið.

Royndarverkætlanin fevnir eisini um at finna besta snið til orkuverkini (drekarnar), og Minesto arbeiðir tí støðugt við at dagføra snið og funktiónir.

Nýggjasta sniðið 'Dragon 4' hevur eitt nakað øðrvísi snið enn tann fyrsti drekin hevði.