Varðagøtan fram til 2030

Kósin er sett móti málinum um 100% burðardygga elorku á landi.

Men hvussu náa vit málinum? Hvørjar útbyggingar skulu gerast, hvussu stórar skulu tær vera, nær skulu tær gerast, og hvar skulu tær gerast?

Varðagøtan vísir, hvussu vit á skilabestan hátt náa málinum um burðardygga elorku. Varðagøtan, sum er ein útbyggingarætlan, verður dagførd regluliga, og fyrilit verður tikið fyri nýggjum tøkniligum loysnum, kostnaðarmetingum v.m.

Útbyggingarætlanin fevnir m.a. um

• vindorkuútbyggingar, sum myndugleikin fyriskipar í útboðum,
• vatnorkuútbyggingar, sum Sev stendur fyri - herundir eisini pumpuskipan
• sólorkuanlegg, í ein so stóran mun, at bæði húsarhald, tað almenna eins væl og vinnufyritøkur mugu vera við, um tað skal gera mun.

Sum sæst, er sjóvarfalsorka enn ikki partur av varðagøtuni. Tá royndarverkætlanin í Vestmannasundi er av, vita vit betur, um og hvønn leiklut hon skal hava í útbyggingarætlanini.