Eitt fet nærri sjóvarfalsorku úr Vestmannasundi

 17-03-2020
Ávegis kunning um sjóvarfalsorkuverkætlanina í Vestmannasundi

Farið er undir seinastu fyrireikingarnar av sjóvarfalsverkætlanini í Vestmannasundi, sum ætlandi skal framleiða streym inn á netið hjá SEV. Fyrsti drekin er settur saman, og verður í løtuni royndarkoyrdur á verksmiðjuni.

 

Í februar skrivaðu Minesto og SEV undir sokallaða PPA - Power Purchase Agreement. Sambært avtaluni bindur SEV seg til at keypa orkuna, sum fer at verða framleidd við sjóvarfalstøknini hjá Minesto í Vestmannasundi. Sum tann fyrsta og einasta av sínum slag er avtalan um keyp av framleiddari sjóvarfalsorku inn á eitt virkandi elnet, ein søgulig avtala.

 

Minesto er í løtuni í ferð við at gera royndir og eftirkanningar av DG100 sjóvarfalsdrekanum og tøknini á turrum í Gøteborg, og at fyrireika flutningin til Føroya.

 

Sjókaðalin, sum leiðir elorkuna, kemur upp á land á Oyrargjógv, har ein fyribils transformarastøð verður sett upp til at taka ímóti framleiddu elorkuni. Arbeiðið við at klárgera økið á Oyrargjógv er byrjað, og støðin verður sett upp í næstum.

 

 

Minesto hevur sett á stovn eitt føroyskt dótturfelag undir navninum Sp/f Minesto Føroyar, sum fer at umsita og víðarimenna verandi og komandi sjóvarfalsorkuverk í Føroyum.

 

Í viðmerking til støðuna við Coronasmittuna, sigur Martin Edlund: “Sum øll onnur fylgja vit væl við støðuni, og gera alt tað vit kunnu, fyri at tryggja starvsfólk okkara og fyri at taka samfelagsatlit í øllum teim londum og økjum, sum vit virka í. Higartil hava ongar umráðandi veitingar ella tænastur verið ávirkaðar av COVID-19 støðuni.”